ნატურმორტი

შესრულების წელი:  2007წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა 
  დათო პოპიაშვილი  იმ მხატვართა  რიგს  მიეკუთვნება, რომელთა  ფერწერაში  შემოქმედებითად  არის  გააზრებული  ქართული  შუასაუკუნეების  ხელოვნების  უძველესი ტრადიცია.  საქართველოს  პატრიარქის,  მისი  უწმინდესობის  ილია  II  ლოცვა-კურთხევით  შესრულებული  ილუსტრაციები  წიგნისთვის ”მოთხრობები  იესო  ქრისტეზე”ემყარება  მასალის  ცოდნასა  და  შესრულების  პროფესიონალიზმს.
”ნატურმორტი” ამავე  ნიშან-თვისებებით  ხასიათდება. სახარებისეული  ქვეტექსტი აქ  ნათელია. მაგიდაზე  სხვადასხვა  ნივთებთან  ერთად  ჯამები  დგას, რომლებშიც  შეღებილი  კვერცხები  აწყვია.  სიბრტყობრივი, ლაკონიური  კომპოზიცია, გამარტივებული ფორმა, საგანთა და ფერადოვან  ლაქათა  განაწილების  რიტმი  კომპოზიციას  სიმშვიდისა  და  მნიშვნელოვნების  განწყობას  ანიჭებს. სურათის  ფონი  მთლიანად  იფარება  ძველი  ქართული  ტექსტებით,  რაც  საერთო  კომპოზიციაში  კარგად  ეწერება  და  დეკორატიულობას  ანიჭებს  მას. თავშეკავებული  და  ზომიერია  ფერადოვან  ლაქათა  გადათამაშება  სიბრტყეზე. წითელი  ფერის  ლაქების ”მოძრაობა” დეკორატიულთან  ერთად აშკარად  ატარებს  საკრალურ  ფუნქციას  და  ქრისტეს აღდგომის  თემასთან  ასოცირდება.

პეიზაჟი

შესრულების წელი:  2007წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა 

განიერ მდინარეზე ნავი მიცურავს. მდინარის ნაპირზე წითელსახურავებიანი  თეთრი ქვის სახლები დგას. სახლების წინ ხე. მარჯვნივ, შემაღლებაზე, ამწვანებული ხეების რიგი. მარცხნივ გზას ზღვისკენ მივყავართ. გზაზე ადამიანთა ფიგურები მოჩანს. გარემო  თითქოს გარინდულია. გარშემო სიმშვიდეა და არაფერი არღვევს ამქვეყნიური ყოფის ჰარმონიულობას. დავით პოპიაშვილის შემოქმედების კრედო სწორედ რეალობის სახარებისეული აღქმაა: სიმშვიდე და მოთმინება. ამიტომ მისი ნამუშევრები ყოველთვის ამ განწყობის მატარებლები არიან.
პეიზაჟი გამორჩეული ნამუშევარია ფერწერული გადაწყვეტის თვალსაზრისით. აქ მხატვარი გაბედულ კოლორისტად  გვევლინება,  რის  საშუალებას  მას  თავად პეიზაჟის  ჟანრის  თავისუფალი  ხასიათიც  აძლევს. მონასმი  ფართო  და  თავისუფალია,  კონტრასტები  გაბედული  და  გააზრებული.  გამოსახული  საგნის  სპეციფიკიდან  გამომდინარე  მხატვრის  წერის  მანერა  ხან  ფენობრივია,  ხან  კი  შედარებით  გლუვი.  სურათის  ფერწერული  სტრუქტურირების  ხარისხი  მხატვრის   მაღალ  საშემსრულებლო  ოსტატობაზე  მიუთითებს.