შესრულების წელი:  2006წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა

  
 XX საუკუნის ბევრი მხატვარი ცდილობდა მუსიკალური ბგერისა თუ ნაწარმოების ჟღერადობა, განწყობილება და ემოციურობა სახვითი ხელოვნების ვიზუალური ხერხების საშუალებით გადმოეცა. კლოდ დებიუსის მუსიკის პოეტურობა და გამომსახველობა თბილელის ფერწერული ოპუსის შთაგონების წყაროა. იმპრესიონისზმისთვის დამახასიათებელი სახვითი ელემენტებისა და სახვით მხატვრული სახის მუდმივი ცვალებადობა ამ ნამუშევარში აშკარად საგრძნობია. მეტყველი ხაზი, ფიგურათა დახვეწილი, ნერვული სილუეტები, ფერადოვანშეთანხმებათა ფორმათა რითმი განსაზღვრავენ ამ შთაბეჭდილებას. ვერტიკალურ და ვიწრო სასურათე არეზე გაშლილი, თითქოს ერთი ტალღისებური მოძრაობით გაერთიანებული ყოველი  სახვითი თუ კომპოზიციური ელემენტი მოძრაობაშია და სურათის საერთო დინამიზმს განაპირობებს. თბილელის შემოქმედებისთვის დამახასიათებელი პოლისტილისტიკა - აღმოსავლური დეკორატიულობისა და დასავლური სინატიფით ვლინდება. აქ რეალური და ფანტასტიკური  ორგანულად ერწყმის ერთმანეთს  და დებიუსის მუსიკისა და ფავნის ზღაპრულ სამყაროსაც გვაზიარებს.

ვენეციის კარნავალი

შესრულების წელი:  2006წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა

 ხაზობრივ და სახვით დომინანტს წარმოადგენს კომპოზიციის მთელ სიგრძეზე  გამოსახული ფიგურები. კომპოზიცია ფიგურებით უფრო დატვირთულია, მაგრამ კომპოზიციის გადაწყვეტითა და მხატვრული სახეების ხასიათით მეტი თავშეკავებით გამოირჩევა. აქ წინა პლამზე  ქალისა და მამაკაცის ფიგურებია გამოსახული. ქალის უკან ცხენის ფიგურა მოსჩანს. სურათში სიუჟეტის განვითარება სასიყვარულო ინტრიგაზე მიგვანიშნებს, რასაც მამკაცის ზურგს უკან მზირალი ქალის სახის გამომეტყველება და ჟესტი მიუთითებს. ქალისა და მამაკაცის ფიგურებს შორის  პატარა ცხოველის ძლიერ დეკორატიული ფიგურაა მოცემული. ამდენად ავტორი ამ კომპოზიციებში კარნავალის განსხვავებულ, მაგრამ სახასიათო სურათს იძლევა და მაყურებელს  სადღესასწაულო განწყობას უქმნის. ამასთანავე თავისი ნარატიულობით ეს სურათები მაყურებლისკენ გულდასმით დათვალიერებას ითხოვს. სიუჟეტური ქარგა ნელ-ნელა იხსნება. ნამუშევრები დატვირთულია სახე - სიმბოლოებით, რომელნიც საერთო დეკორატიულ კომპოზიციებში ჩართულნი მხატვრის მიერ ინტერპრეტირებული და შესაბამისებულია სიუჟეტის  განვითარების ლოგიკას: ნიღბები, თოჯინები, არქიტექტურული დეტალები, ფარშევანგები, დეკორატიული ძაღლები და ფრინველები, ყვავილები. . . სურათის ერთიანი დეკორატიული ”ქსოვილი” ზედა რეგისტრში სხვადასხვა სიუჟეტურ  კომპოზიციებით წყდება, რომლებზეც გამოსახულია ვენეციის სპეციფიკური არქიტექტურისა და განაშენიანების, ხიდებისა და არხების ხედები. ყოველი კომპოზიცია აზრობრივად უკავშირდება კომპოზიციების მთავარ თემას - ვენეციის კარნავალს. მხატვარი ერთდროულად წარმადგენს მის მიერ შექმნილ ზღაპრულ, წარმოსახვით სამყაროს, სადაც გამოგონილისა და რეალურის ფანტასმაგორიული სინთეზი და ვენეციის კარნავალის სრულიად კონკრეტული თემა უაღრესად ნატიფ, მეტყველ მხატვრულ  - სახეობრივ განხორციელებას იძენს.

ტრიპტიხი

შესრულების წელი:  2005წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა

 
  სერგო თბილელის შემოქმედებისთვის დამახასიათებელია სიუჟეტური თუ მხატვრული გადაწყვეტით მსგავსი კომპოზიციების მაყურებლისთვის ერთ კონტექსტში წარმოდგენა. ანტიკურ თემაზე შესრულებული ტრიპტიხი სამი დამოუკიდებელი კომპოზიციისგან შედგება: ”დიონისე და სატირუსი”, ”კენტავრი ქირონი” და ”მეტამორფოზა XII სიმღერა”.
   ტრიპტიხის ცენტრალურ კომპოზიციას ”კენტავრი ქირონი” წარმოადგენს, რომლისკენაც არის მიმართული დანარჩენი კომპოზიციების ყველა სახეობრივი ელემენტი. კენტავრისა და მეტამორფოზების კომპოზიციის ზოგიერთი დეტალი ერთმანეთშიც კი გრძელდება, მაგრამ ამასთანავე ყოველი კომპოზიცია ცალკე აღებული სრულიად დასრულებულ შთაბეჭდილებას ტოვებს. მხატვრის მიერ ეს სურათები იმგვარად არის გააზრებული, რომ ცალკეულ კომპოზიციებადაც იკითხება და ამასთანავე ერთ დეკორატიულ ჩარჩოში გაერთიანებული ერთმანეთის ლოგიკურ მხატვრულ გაგრძელებას წარმოადგენს.

ტრიპტიხი. დიონისე და სატირუსი

შესრულების წელი:  2005წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა
   
   ანტიკური მითოსი სერგო თბილელის ფერწერული ექსკურსების ერთ- ერთი თემაა. საქართველოში ვაზი და მეღვინეობა უძველეს კულტურულ ტრადიციებსა და რიტუალებთანაა დაკავშირებული. სახვით ხელოვნებაში ვაზისა და ლხინის ღმერთის - დიონისეს სახეც განსაკუთრებით პოპულარულია. დიონისეს მუდამ თან ახლდა მხიარული მხლებელთა ამალა: სატირები, სილენები და მენადები…
     სერგო თბილელის ფერწერული ინტერპრეტაცია ანტიკური მითოსის თემაზე ამბის მთავარ გმირად  სწორედ სატირუს წარმოგვიდგენს.
     სატირუსის ფიგურა გამოსახულია წინა პლანზე და აქტიურ მოძრაობაშია მოცემული. მის ფიგურას მხატვარი წარმოგვიდგენს  ტრადიციული სახით  - ადამიანის თავითა და ტორსით, თავზე პატარა რქებით და  ცხოველის ფეხებით. სატირუსის შიშველი ფიგურა დაუფარავი  ფალოსით ნაყოფიერების სიმბოლოს წარმოადგენდა. მხატვარი  დამაჯერებლად გადმოსცემს ამ მხიარულ, სიყვარულისა და დროსტარებისმოყვარე დემონის სახეს. სკულპტურულ -მოცულობითი დამუშავებითაა  წარმოდგენილი ბახუსის სახე, ხელები და ფეხის ტერფები. სხეული კი განსხვავებით სიბრტყობრივ - დეკორატიული გადაწყვეტით ხასიათდება და ფონის ხალიჩისებური   ქსოვის საერთო კომპოზიციაშია ჩართული. გეომეტრიულ  - მცენარეული ორნამენტებით დაფარულ სასურათე სიბრტყეზე მკაფიოდ გამოიყოფა სატირუსის ფიგურა, ბახუსის სახე , ხელები. . . ამ დეკორატიულ ”ქსოვაში” მხატვარი ფიგურატიულ აქცენტებად გამოყოფს ვაზისა და ბროწეულის ნაყოფებს, რომლებიც სიმბოლურად უკავშირდება ანტიკური მითოსის გმირებს.
     თბილელის კომპოზიციების მხატვრული წყობა სიბრტყობრივ - დეკორატიულისა და პლასტიკურ - მოცულობითის უჩვეულო  ნაზავს წარმოადგენს და მაყურებლის მეხსიერებაში დიდი ხნით რჩება.

ტრიპტიხი. კენტავრი და ქსირონი

შესრულების წელი:  2005წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა
 

  ბერძნული მითოსის  მიხედვით  რეასგან ფარულად დაქორწინებული კრონოსისა და ოკეანიდა ფილირის ვაჟი, ქირონი ნახევრად ცხენისა და ნახევრად ადამიანის  სახით იმის გამო დაიბადა, რომ ღალატისას რეას რისხვისგან თავის დასაღწევად კონოსმა ცხენის სახე მიიღო.
    ქირონი კენტავრთა შორის განსაკუთრებული სიბრძნითა და გამჭრიახობით გამოირჩეოდა. იგი იყო ბერძენი გმირების თეზევსის, იასონისა და დიოსკურების გამზრდელი.
    ფერწერული კომპოზიცია რამდენიმე დონეზე იშლება. ძირითადი სიბრტყე გეომეტრიული და მცენარეული ორნამენტებით დატვირთული დეკორატიული ჩარჩოთია  შემოსაზღვრული, რომელიც ზოგ ადგილას ძირითადი სცენის ნახატს აგრძელებს და ამდენად ორგანულ კავშირშია მასთან მხატვარი, ისევე როგორც მისი შემოქმედებისთვის არის დამახასიათებელი წინა პლანზე ფიგურებს, კენტავრსა და მასზე  მჯდომ ქალს, გამოსახავს. მათი ერთმანეთისკენ მიმართული სხეულები, მზერა, ჟესტიკულაცია ფიგურათა მყარ ტანდემს ქმნის. მათ შორის გარკვეული ფსიქოლოგიური კავშირი მყარდება. ფონი,რომელზეც ფიგურები არიან წარმოდგენილნი, ერთი შეხედვით თითქოს ხალიჩისებურ ორნამენტულ- დეკორატიულ სიბრტყეს ქმნის, მაგრამ დაკვირვებისას აშკარა ხდება, რომ მხატვრის მიერ ეს სიბრტყე გააზრებულია ობიექტური  შინაარსობრივი ლოგიკის მიხედვით. კომპოზიციის ქვედა ნაწილში, რომელიც მიწასთან ასოცირდება, დახვეწილი ორნამენტის სახით გამოსახულია ერთმანეთში  ჩახვეულ მცენარეთა სტილიზებული გამოსახულებები. ზედა ნაწილში კი სიბრტყე მთლიანად იფარება გეომეტრიული ორნამენტით, რომელიც ნაგებობათა გამოსახულების ასოციაციას იწვევს. ამ განწყობას აძლიერებს ამ საერთო ორნამენტულ ქსოვილში ჩართული ანტიკური ტაძრის დამაჯერებლად შესრულებული ფრაგმენტები.
    ამ ნახევრად ზღაპრული თემის გადმოცემისას მხატვარი მიზნად ისახავს რეალური  ფორმისა და მკვეთრად გამოხატული დეკორატიული მოტივების უჩვეულო  სინთეზის საშუალებით მიაღწიოს ბერძნული მითოსის თემას საკუთარ, ორიგინალურ ინტერპრეტაციას.

ტრიპტიხი.XII სიმღერის მეტამორფოზა

შესრულების წელი:  2005წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა
   
  რომაელი პოეტის ოვიდიუს ნაზონის პოემა ”მეტამორფოზები” ანტიკური პოეზიის ერთ-ერთი საუკეთესო  ნაწარმოებია. ავტორი ძველ ბერძნულ და რომაულ პოემებსა და  მითებს  ახალ ჟღერადობას ანიჭებს. მიმზიდველად მოთხრობილი ეპიზოდები სამყაროს მარადიული  ცვალებადობის, უწყვეტი მოძრაობის, გარდასახვათა შესახებ ინტერპრეტაციისა და მხატვრული წარმოსახვისთვის თბილელს  განუსაზღვრელ მასალას  აძლევს. ერთი მატერიიდან მეორეში გარდასახვა - გარდაქმნა თბილელის მხატვრული  სახის დამახასიათებელი თვისებაა. მის ფერწერულ  კომპოზიციებში ადამიანისა თუ ცხოველის ფიგურა, გარკვეული საგნები თუ ნაგებობანი,  ხშირად მცენარეულ თუ გეომეტრიულ ორნამენტებად  გარდაიქმნება. ეს მხატვრული ხერხი მაყურებელზე ზემოქმედების ერთ-ერთი ყველაზე ძლიერი საშუალებაა. ამასთანვე იგი კარგად ესადაგეა ოვიდიუსის  პოემის სპეციფიკას. ბუნებრივია მხატვრის მიერ კონკრეტულად ამ პოემით  დაინტერესება შემთხვევითობა არ არის  და პოემით მიღებული  შთაბეჭდილების  საკუთარი  ინტერპრეტაციის  გააზრებული მცდელობაა. მეტამორფოზების XII წიგნში მოთხრობილია ტროას ციკლის  თქმულებები. თბილელი არასდროს  მიმართავს კონკრეტული ნაწარმოების ილუსტრაციას, არამედ ქმნის ერთგვარ სახვით - ფერწერულ ასოციაციებს მოცემულ  თემაზე. ამ სურათში ყველა კომპოზიციური ელემენტი  - ხაზი, ფერის ლაქა, ფორმა, გამოსახულებათა ჟესტიკულაცია, სილუეტები მოძრაობაშია მოყვანილი და არაჩვეულებრივად დინამიკურ ფერწერულ  კომპოზიციას ქმნის.

მგლების ხორუმი

შესრულების წელი:  2005წ.
მოჩარჩოება:  კი/არა
ნამუშევრის დახვევის შესაძლებლობა ტრანსპორტირების დროს: კი/არა

 თბილელი  ნაწარმოებთა შერჩევისას ხშირად მიმართავს მითოსს, ფოლკლორს. იდუმალებით მოცული ზღაპრული სამყარო  მხატვრის მდიდარ წარმოსახვას თემის ფერწერული ინტერპრეტაციისთვის განუსაზღვრელ მასალას აძლევს. უძველესი ხალხები მგელს თავის ტოტემად თვლიდნენ და თაყვანს სცემდნენ. მგელი და მგლის სახიანი ადამიანი მითოლოგიაში ბელადისა და წინამძღოლის კულტთანაა დაკავშირებული. მგლისთავიანს უწოდებდნენ ქართლის მეფეს ვახტანგ გორგასალს. ამასთანავე მგელი სასტიკი და იდუმალი ტოტემია. მაქცია, რომელსაც ზებუნებრივი ძალა გააჩნია და ბოროტ ძალასთან ასოცირდება, მგლის სახეს იღებს. ეს მოტივი და მისი განსხვავებული ინტერპრეტაციები ხშირია დასავლურ კულტურსა და ხელოვნებაში. ”მგლების ცეკვა” თბილელის ერთ-ერთი საუკეთესო ნაწარმოებია. თემის მხატვრული გააზრება განსაკუთრებული გამომსახველობითა და ემოციურობით არის განხორციელებული. ამასთანავე იდუმალებისა და ქვეტექსტის შეგრძნება ამ ნამუშევრის ხილვისას მაყურებელს თითქმის ყოველთვის თან მიჰყვება. დიდი ზომის, ვერტიკალურ სიბრტყეზე გამოსახული მოცეკვავე ადამიანის ფიგურა ხელში საყვირით. მას თავზე მგლის ნიღაბი უკეთია. მოხრილ ფეხზე ფრთაგაშლილი გედი უზის, რომლის ფრთები მკერდზე ეფინება. მის ფეხრთით მგლის ნახევრად  ფანტასტიკური ფიგურაა, რომელიც მაქციას უფრო გავს, ვიდრე უბრალოდ ცხოველს. მისი მაყურებლისკენ მიმართული მზერა, მახვილი კბილები, კისრის გარშემო საყელოსავით შემოვლებული ბეწვი აძლიერებს ამ შთაბეჭდილებას. ფიგურათა სხეულები დამაჯერებლადაა ნაძერწი ყავისფერის სხვადასხვა ტონალობებით. სურათის კომპოზიციურ - სახეობრივ წყობაში განსაკუთრებული გამომსახველობითა  და მრავალფეროვნებით ხასიათდება სურათის ხაზობრიბ - ორნამენტული რითმი. სხვადასხვა ორნამენტული მოტივი ერთმანეთს ცვლის, მუდმივ მოძრაობაშია, რაც  ცხოველხატულებისა და დინამიკის შთაბეჭდილებას განაპირობებს. ამ ნამუშევარში მხატვარი აღწევს დეკორატიულობისა და სახვითობის სინთეზს. ფერწერული ნამუშევრის სახასიათო და მეტყველი მხატვრული სახეები, კომპოზიციური გადაწყვეტის თავისებურება და ესთეტიზმი მაყურებელზე  ძლიერ ზემოქმედებას ახდენს. 
   სურათი კარგად  განთავსდება ფართო სივრცეში და განსაკუთრებით მეტყელ სახვით - დეკორატიულ აქცენტს შექმნის.