ლევან ვარდოსანიძის პლასტიკური  ნამუშევრები  ორიენტირებულია  რეალისტური  ფორმისა  და  პირობით-დეკორატიული  გადაწყვეტის  უჩვეულო  სინთეზზე. თითოეულ  ნამუშევარში  ნიუს  თემაზე  ავტორი  ქალის  შიშველი  ფიგურის  მხატვრული  ინტერპრეტაციის  მოულოდნელ  ვარიანტს  გვთავაზობს,  ამიტომ  მისი  ნამუშევრები  ყოველთვის  საინტერესო  და  ორიგინალურია.  ქანდაკებაში ”ცეკვა  სარკეზე”მხატვარი  მიმართავს  ფორმის  აბსტრაგირებასა  და  სტილიზაციას. ძირითადი  ფორმებისა  და  კონტურის  რეალისტური  გამოსახვა  და  მასთან  კონტრასტული  გადაწყვეტა:ფიგურის  თავის  გარეშე  წარმოდგენა, თავს  ზემოთ  აწეული  ხელების  რკალი, რომელიც  სარკის  ასოციაციასაც  აღძრავს, იწვევს  დეკორატიულობის  განწყობას. ნამუშევარს  განსაკუთრებულ  ცხოველხატულებას  ანიჭებს  სხვადასხვა  ფერისა  და  ფაქტურის  მასალის  სინთეზი. დახვეწილი  სილუეტი, წაგრძელებული  პროპორციები  და  მომრგვალებული  ფორმების  დენადი  რიტმი  ამ  ფიგურას  განსაკუთრებულ  ესთეტიზმს  ანიჭებს.

როდეო 5/9

 ცხენოსანი ფიგურა  მოქანდაკეთა  საყვარელი  თემაა. შემოქმედს  იგი  აძლევს  საშუალებას  მაქსიმალურად  სრულყოფილად  წარმოაჩინოს  საკუთარი  ტემპერამენტი. ეს  მოტივი  თავის  თავში  მოიცავს  ჯგუფურ  კომპოზიციას, პორტრეტს...მხატვარი  დგება  ურთულესი  ამოცანის  წინაშე-მიაღწიოს  ორგანულ  ერთიანობას  ფიგურათა  შორის, წარმოადგინოს  დასახული  ამოცანის  შესაბამისად  მოძრაობის  დინამიკა  თუ  ხაზი  გაუსვას  კომპოზიციის  შინაგან  სტატიკას. ლევან  ვარდოსანიძის  ”როდეო” მხატვრის ერთ-ერთი  ყველაზე  ექსპრესიული  ნამუშევარია. კომპოზიციის  ყველა  კომპონენტი  ქანდაკების  საერთო  განწყობილების  გადმოცემას  ემსახურება. პლასტიკური  ექსპრესია, რომელიც  ამ  მცირე  ზომის  ნამუშევარს  ახასიათებს  კომპოზიციური  აგების  დინამიკითა  და  მხატვრულ  სახეთა  დაძაბულებით  მიიღწევა. მხატვარი  გამოსახავს  მოქმედების  ყველაზე  კულმინაციურ  მომენტს  ყალყზე შემდგარი  გაუხედნავი  ცხენისა  და  მის  ფაფარში  ჩაფრენილი  მამაკაცის  ფიგურა  ერთმანეთს  ერწყმის  და  ერთ  მთლიანობად  იკითხება. დაძაბულებისა  და  ექსპრესიულობის  შთაბეჭდილებას  აძლიერებს  აგრეთვე  პოსტამენტისა  და  ფიგურის  ზომათა  შეფარდება. დამაჯერებლად  არის გადმოცემული  ცხენისა  და  ადამიანის  დაძაბული  მოძრაობის  შედეგად  დაჭიმული  კუნთების  მოცულობები, საგრძნობია  სხეულთა  ფაქტურული  ტექსტურა. ავტორი  სახვით დეკორატიულ  ეფექტს  აღწევს  ბრინჯაოს  მასალის  ტონირების  საშუალებით მომწვანო ”პატინა”აძლიერებს  კომპოზიციის საერთო  ცხოველხატულებასა  და  დინამიკას.

ტორსი

 შიშველი  ფიგურის  განსხვავებული  ვარიანტია  ვარდოსანიძის  სკულპტურულ  ნამუშევართა  გალერეაში. თეთრ  მარმარილოში  შესრულებული  ქალის  ტორსი  ანტიკური  ვენერების  მხატვრისეული  ინტერპრეტაციაა. აქ  რეალისტურისა  და  თანამედროვე  ხელოვნებისთვის  დამახასიათებელი  პირობით-დეკორატიული  სახვითი  ფორმების  ორიგინალურ  სინთეზს  ვხედავთ. სკულპტურული  ფორმის  გარკვეული  სტილიზაციისა  და  უტრირებისა,  მხატვრული  სახე  ინარჩუნებს  ქალის  სხეულის  სპეციფიკურობასა  და  გრაციოზულობას.  ფორმათა  დამუშავების  სირბილე, კონტურისა  და  სხეულის  ძირითადი  ფორმების  აღმნიშვნელი  მომრგვალებული  ხაზების  დენადი  რიტმი  იძლევა  სრულყოფილ  პლასტიკურ  ფორმას, რომლის  ფაქტურულობა  ხელშესახებად  საგრძნობია. დამატებით  და  ძლიერ  დეკორატიულ  ეფექტს  ქმნის  სხეულის  თეთრი  მარმარილოსა  და  საფეხურებიანი  პოსტამენტის  სხვადასხვა  ფერის  მარმარილოს  კონტრასტი.

სოლთლეიკის ქალი

 ”სოლთ ლეიქის ქალი” ვარდოსანიძის  შემოქმედებაში ერთ-ერთი მნიშვნელოვანი  ნამუშევარია. იგი  2002 წელს აშშ-ს ქალაქ  სოლთ  ლეიქ სითიში გამართულ  ზამთრის  ოლიმპიურ  თამაშებს  ეძღვნება. ეს  ნამუშევარი  საქართველოს  ოლიმპიური  კომიტეტის  დალეგაციის  მიერ  საჩუქრად  გადაეცა  სოლთ  ლეიქ  სითის  ზამთრის  ოლიმპიური  თამაშების  საორგანიზაციო  კომიტეტს.
პლასტიკური  იდეა, რომელიც  სახასიათოა  ლევან  ვარდოსანიძისთვის, მის  შემოქმედებაში  სხვადასხვაგვარ  ინტერპრეტაციას  იძენს. სპორტის  თემაზე  შესრულებულ ნაწარმოებებს  შორის  სოლთ  ლეიქის  ქალი გამოირჩევა  თემის  გადაწყვეტის  ორიგინალობითა  და  პლასტიკური  ფორმის დინამიკურობით. აქ  მხატვრის  პირობით-დეკორატიული  სახვითი  ენა  და  მხატვრული  წარმოსახვა  განსაკუთრებული  სიმძაფრით ვლინდება.  ყინულის  მოედანზე  მოცეკვავე  ქალის  ფიგურა  ისეთი  სისწრაფით  ტრიალებს, რომ  მისი  სახის  აღქმა  შეუძლებელია. ეს  განცდა  ყველა  ჩვენგანისთვის ნაცნობია  და  მხატვარიც  ქანდაკებაში  ამ მოძრაობის  ვიზუალურ გამოხატულებას ახერხებს. ხელებისა  და  საცეკვაო  კაბის  სპირალისებრი  მოძრაობა  ფიგურას  განსაკუთრებულ  დინამიკას  ანიჭებს. მხატვარი  ოსტატურად  იყენებს  პოსტამენტს, რომელსაც  ფიგურა  თითქოს  ოდნავ  ეხება. იგი  საყდენიც  არის  და  ამავე  დროს  მისი  გაპრიალებული  ზედაპირი  ყინულის  მოედნის  ასოციაციასაც  იძლევა.

მის ჰარლი დევიდსონი

 სპორტი, სიჩქარე, დინამიკა-მხოლოდ  ძირითადი  ფორმებით  გადმოცემული  ქალის  ფიგურა  და  ამერიკული ”რკინის  რაში”.ქალის  სხეული  ძლიერი  და  მოქნილია.  მისი  პოზა  დამაჯერებელი. თავზე  ჩაფხუტითა  და  ხელზე  ხელთათმანებით  თამამად  მართავს  უსწრაფეს  მანქანას.  ავტორს  ზუსტად  აქვს  მიგნებული  ამ  მხატვრული  სახის  რეალიზებისთვის  საჭირო  ყველა  ელემენტი: სკულპტურული  ფორმა, მოძრაობა, რითმი, მასალა,ფერი.  აქ  არაფერია  ზედმეტი.  ყოველი  ნიუანსი  გააზრებული  და  ამ  მკაცრი,  ლაკონური  კომპოზიციის  აუცილებელი  შემადგენელი  ნაწილია.  მხატვრული  სახე,  რომელსაც  ავტორი  გვთავაზობს, იმდანად  რეალური,  სახასიათო  და  დამაჯერებელია,  რომ  მაყურებელს  არ  უჩნდება  კითხვა  ფიგურისა  და  მანქანის  გამოსახულებათა  აბსტრაგირების  გამო.
ავანგარდული  მოძრაობა  და  მეამბოხე  სული  ამ  ნამუშევარს XX  სუკუნის  20-იანი  წლების  ხელოვნებასთან  აახლოებს.